Innst. 271 S (2024–2025) Innstilling til Stortinget frå transport- og kommunikasjonskomiteen Dokument 8:100 S (2024–2025) Innstilling frå transport- og kommunikasjonskomiteen om Representantforslag fra stortingsrepresentantene Terje Halleland, Frank Edvard Sve, Morten Stordalen, Bård Hoksrud, Roy Steffensen og Morten Wold om prøveordning for kolonnekjøring for tunge kjøretøy på E134 over Haukelifjell Til Stortinget Bakgrunn I dokumentet blir det fremja følgjande forslag: «Stortinget ber regjeringen gjennomføre en prøveordning med kolonnekjøring for tunge kjøretøy på E134 over Haukelifjell.» Ein viser til dokumentet for ei nærare utgreiing om forslaget. Behandlinga i komiteen Samferdselsminister Jon-Ivar Nygård har uttalt seg til forslaget i brev av 18.  mars 2025. Brevet følgjer som vedlegg til denne innstillinga. Det blei opna for skriftlege innspel. De fem mottekne innspela er gjort tilgjengelege på saka si side på stortinget.no. Merknader frå komiteen Komiteen, medlemene frå Arbeidarpartiet, Jone Blikra, Tom Einar Karlsen og Marte Mjøs Persen, frå Høgre, Liv Kari Eskeland, Trond Helleland og Erlend Larsen, frå Senterpartiet, leiaren Sigbjørn Gjelsvik, Geir Adelsten Iversen og Geir Inge Lien, frå Framstegspartiet, Gunnhild Meringdal og Morten Stordalen, frå Sosialistisk Venstreparti, Mona Fagerås, og frå Venstre, André N. Skjelstad, viser til Representantforslag 100 S (2024–2025) fra stortingsrepresentantene Terje Helleland, Frank Edvard Sve, Morten Stordalen, Bård Hoksrud, Roy Steffensen og Morten Wold om prøveordning for kolonnekjøring for tunge kjøretøy over E134 Haukelifjell. Komiteen merkar seg at forslagsstillarane peikar på at det har blitt diskutert etablering av eigne tungbilkolonnar gjennom fleire år, og at det er etablert eigne oppstillingsplassar for tungbil på kvar side av fjellet. Forslagsstillarane viser til at det alltid vil vere driftsansvarleg som avgjer om ein kolonne skal gå, og kven som kan vere med i kolonnen. Komiteen viser vidare til statsrådens svarbrev av 18. mars 2025. Statsråden understrekar at fjellovergangen er ein av dei mest trafikkerte fjellovergangane i Noreg, og at kolonnar over fjellovergangen i dag går med både små og store bilar. Vidare påpeikar statsråden at det har pågått dialog mellom Statens vegvesen (SVV), Norsk Lastebileierforbund (NLF) og driftsentreprenøren om kolonnekøyring med eigne kolonnar for tyngre køyretøy over Haukeli. Statsråden påpeikar at det er ei stor utfordring at tunge køyretøy set seg fast i stigninga opp frå vest. Komiteen merkar seg også at Samferdselsdepartementet påpeikar at terskelen for å halde vegen open ikkje kan senkast utan at driftsentreprenørens sikkerheit vert utfordra. Vidare merkar komiteen seg at det er utført ein del tiltak for å betre trafikksikkerheita og framkome for dei vegfarande. Vidare merkar komiteen seg at det er sett i gang eit pilotprosjekt for bilberging, og at departementet ønsker å sluttføre dette prosjektet før ein startar nye pilotprosjekt. Komiteen sende representantforslaget på høyring og merkar seg at det er kome inn fleire høyringsinnspel, som alle på ulike måtar støttar oppstart av ei prøveordning med kolonnekøyring for tunge køyretøy på E134 over Haukelifjell. Komiteen viser til argumentasjon og bakgrunn for ønske om å etablere eigne tungbilkolonnar over Haukeli. Komiteen merkar seg at det er sett i gang fleire tiltak og prosjekt, som alle bidreg til at oppetida over Haukelifjell vinterstid er så optimal som mogleg, noko ein har jobba med over fleire stortingsperiodar. Driftsoperatør, Lastebileigarforbundet (NLF) og Statens vegvesen (SVV) er i kontinuerleg dialog om tiltak som bidreg til at fjellovergangen er open så mykje som mogleg, sjølv om været og fastkøyrte køyretøy utfordrar oppetida. Eit av argumenta for at ein fram til no ikkje har kunna tillate tungbilkolonnar, har vore at det fysisk ikkje har vore tilrettelagt for ei slik ordning. Dette er no på plass på begge sider av fjellet, og er såleis ikkje lenger eit hinder for å tillate eigne tungbilkolonnar. Komiteen viser vidare til innkomne høyringsinnspel og registrerer at samtlege er positive til den foreslåtte prøveordninga. Komiteen viser til statsråden sitt svar, og merkar seg følgjande formulering: «Representantforslaget viser til at det noen ganger er helt nødvendig å stenge veien, men med riktige forberedelser kan det være mulig å kjøre tunge kjøretøy over strekningen. Dette utgangspunktet er jeg enig i.» Komiteen merkar seg vidare at statsråden ønsker å ferdigstille og evaluere prosjektet «pilot for bilberging» utan at resultata blir påverka av nye prosjekt, for å kunne vurdere effekten av bilbergingsprosjektet. På vegner av næringsliv og transportsektoren ser ikkje komiteen at det er eit godt nok argument i høve til å utsette eit prøveprosjekt for tungbil, då ei slik utsetting vil påverke kostnader og inntening til bedrifter og næringsliv. Dette er for komiteen eit tungtvegande argument som er nok til å sette i verk prøveprosjektet allereie for vinteren 2025/2026. Det føreset at sikkerheitsnivået som driftsoperatøren set, blir ivaretatt på same nivå som i dag. Med bakgrunn i denne argumentasjonen, ber komiteen regjeringa iverksette nødvendige tiltak som bidreg til oppstart av eit prøveprosjekt for tungbilkolonnar over Haukeli med start komande vintersesong, og fremjar følgjande forslag: «Stortinget ber regjeringa gjennomføre ei271s er klar prøveordning med kolonnekøyring for tunge køyretøy på E134 over Haukelifjell.» Komiteen meiner vidare at det til ei kvar tid skal vere driftsoperatøren som har det fulle og heile ansvaret for kolonnekøyringa. Det gjev dei også rett til å vurdere situasjonen, og med det avgjere om det kan køyrast eigen tungbilkolonne og kva køyretøy som får lov til å vere med i denne kolonnen. Dette kan også bidra til at tungbilar som skal over fjellet vinterstid, syter for at utstyr og bil til ei kvar tid er tilpassa vær- og føreforhold på best mogleg måte. Tilråding frå komiteen Tilrådinga blir fremja av ein einstemmig komité. Komiteen har elles ingen merknader, viser til dokumentet og rår Stortinget til å gjere følgjande vedtak: Stortinget ber regjeringa gjennomføre ei prøveordning med kolonnekøyring for tunge køyretøy på E134 over Haukelifjell. Oslo, i transport- og kommunikasjonskomiteen, den 6. mai 2025 Sigbjørn Gjelsvik Liv Kari Eskeland leiar ordførar Vedlegg Vedlegg finnes kun i PDF, se merknadsfelt.